اقوام متحدہ دہشت گردی کے خلاف کارروائی تیز کرے: ہندوستان

اقوام متحدہ۔ ہندوستان نے اقوام متحدہ سے دہشت گردی کے خلاف کارروائی کو مزید تیز کرکے دہشت گردوں کو سخت پیغام دینے کو کہا ہے۔ اقوام متحدہ میں ہندوستان کے مستقل ترجمان سید اکبرالدین نے آج یہاں عوامی میٹنگ میں افغانستان کے حالات کا ذکر کرتے ہوئے کہا کہ ممنوعہ طالبان کو دہشت گرد تنظیم قرار دے کر اعلان کرنے کی ضرورت ہے۔ انہوں نے کہا کہ بین الاقوامی قوم دہشت گردی کے خلاف کارروائی کےلئے بے قرار ہے۔انہوں نے کہا کہ جب تک اقوام متحدہ اور اس کے ماتحت کام کرنے والی اکائیاں عالمی



دہشت گردی کےخلاف مشترکہ کارروائی نہیں کریں گی تب تک یہ دنیا کےلئے خطرہ بنا رہے گا۔ مسٹر اکبرالدین نے کہا کہ ہندوستان دہشت گرد تنظیم جیش محمد کو اقوام متحدہ کی بلیک لسٹ میں ڈالنے کی وکالت کرتا رہا ہے لیکن چین کی جانب سے ویٹو کا استعمال کر نے کی وجہ سے یہ معاملہ بھی التوا میں ہے۔ انہوں نے کہا کہ دہشت گرد تنظیم طالبان،حقانی نیٹ ورک ،اسلامک اسٹیٹ،القاعدہ اور ان سے وابستہ لشکر طیبہ اور جیش محمد کے خلاف کارروائی نہ ہونے کی صورت میں لوگوں کے قتل عام کے اعدادو شمار میں اضافہ ہوتا جارہا ہے۔